शेलगाव (बू) हे महाराष्ट्र राज्यातील नांदेड जिल्ह्याच्या अर्धापूर तालुक्यात वसलेले एक महत्त्वाचे गाव आहे. हे गाव जिल्ह्याचे मुख्यालय असलेल्या नांदेड शहरापासून सुमारे २० कि.मी. अंतरावर असून तालुक्याचे ठिकाण अर्धापूरपासून सुमारे ८ कि.मी. अंतरावर आहे. गावाची भौगोलिक रचना, वाहतूक सुविधा आणि शहराजवळील स्थान यामुळे शेलगाव (बू) हे गाव आर्थिक व सामाजिकदृष्ट्या सतत प्रगती करत आहे.सन २०११ च्या जनगणनेनुसार, गावाची लोकसंख्या १,६३३ असून ३२० कुटुंबे येथे वास्तव्यास आहेत.

गावातील लोकसंख्या मुख्यतः शेती, दुग्धव्यवसाय व अन्य पारंपरिक व्यवसायांवर अवलंबून आहे.

नांदेड शहराच्या जवळ असल्यामुळे गावाला शैक्षणिक, आरोग्य व बाजारपेठेच्या सुविधा सहज उपलब्ध होतात. शेती हा गावाचा मुख्य व्यवसाय असून ग्रामीण जीवनशैली, सामाजिक सलोखा व परंपरांचे जतन ही गावाची ओळख आहे.
गावात भव्य ग्रामसंसद भवन बांधण्यात आले असून या कार्यालयामार्फत आपले सरकार सेवा केंद्र चालवले जाते. या केंद्राद्वारे सर्व नागरिकांना वेळेवर संगणकीकृत दाखले व ऑनलाईन सेवा दिल्या जातात.

गावात आत्माराम महाराज मंदिर विशेष धार्मिक स्थळ आहे. गावात  हनुमान, विठ्ठल-रुक्मिणी आणि महादेव मंदिर ही प्रमुख धार्मिक स्थळे आहेत. स्मशानभूमीमध्ये वृक्ष लागवड, पिण्याचे पाणी, बाकडे व शेडची व्यवस्था करण्यात आली असून ते ठिकाण अत्यंत निसर्गरम्य आहे.

गावातील प्रत्येक घरात ओला व सुका कचरा वेगळा ठेवण्यासाठी दोन कचरा कुंड्या देण्यात आल्या आहेत.
अंगणवाडी व जिल्हा परिषद शाळांची रंगरंगोटी, डिजिटल शिक्षण प्रणाली, प्रोजेक्टर व सुंदर बेंचेस यांच्या साहाय्याने विद्यार्थी १००% उपस्थित राहून शिक्षण घेत आहेत.

शेलगाव (बू) हे गाव भौगोलिकदृष्ट्या अनुकूल स्थानावर वसलेले असून ग्रामपंचायत, लोकसहभाग आणि शासकीय योजनांच्या माध्यमातून गावाचा सर्वांगीण विकास साधण्याचे प्रयत्न सातत्याने सुरू आहेत. भविष्यात शेलगाव (बू) हे एक आदर्श व प्रगत ग्रामपंचायत म्हणून नावारूपाला येईल, असा विश्वास आहे.